第一次做依個檸檬汁雞扒係因為雪櫃有兩件雞胸
我又冇IDEA煮乜, 於是問老公想食乜
老公即時提議我地去中菜館時佢好鍾意點嘅Lemon Chicken西檸雞
佢本來只係開下玩笑(因為諗住我實整唔到)
但我最鍾意試新嘢
立即上網東找西找,找來一個看來可靠的食譜
就等我試下啦~~試出嚟又幾好味喎!
值得同大家分享一下!
(這是第一次做的有脆炸皮版本)
材料:
雞胸肉 -------------------------------------------- 2件
檸檬 ------------------------------------------------ 2個
薑蓉------------------------------------------------- 1茶匙
白酒 ------------------------------------------------- 半杯(125ml)
鹽------------------------------------------------------ 1茶匙
胡椒 --------------------------------------------------- 半茶匙
白醋 ------------------------------------------------ 1 茶匙
雞粉 ------------------------------------------------ 1茶匙
熱水 ------------------------------------------------ 200ml
幼砂糖 --------------------------------------------- 90g
粟粉 ------------------------------------------------5 1/2湯匙
雞蛋 ------------------------------------------------ 1 隻
做法:
1) 將雞胸肉切成差不多厚度, 因為澳洲買到的雞胸肉有成1.5cm厚(澳洲唔只D人大隻D, 連雞都大我地成個碼!) 我通當會分半, 令雞肉快熟一點。
將一個檸檬的皮磨成末, 混入薑容, 白酒, 鹽和胡椒用來醃雞胸, 放入雪櫃醃20分鐘。
2) 蛋打發好, 在另一個碗裡加入4湯匙粟粉, 將醃好瀝乾水份的雞扒沾一下蛋液, 然後沾滿粟粉。
3) 平底鑊上下油, 中火燒熱後下雞胸, 每面煎8-10分鐘至金黃色, 可用筷子刺一下, 如肉稍為實而沒有血水流出便完全熟了。
千祈唔好心急, 要煎熟透先放上碟啊!
4) 煎雞扒時, 把另一個檸檬切半, 一半榨成汁, 一半切成薄片作裝飾用。
5) 把檸檬汁, 雞粉, 白醋, 幼砂糖和熱水全倒入醬汁鍋中, 攪拌勻, 以中火加熱至起泡泡, 轉成小火。
6) 把1 ½湯匙粟粉混入少許清水, 攪拌勻, 一邊攪拌一邊加入醬汁鍋中, 待醬汁變濃稠即可熄火。
7) 煎熟的雞扒放在廚房紙上吸一下油。
8) 雞扒上碟, 面鋪檸檬片, 倒上檸檬汁, 即成!
好好味呢~不過第一次做時唔記得放檸檬片做裝飾
第二日, 將醃好的雞扒直接煎, 唔加炸漿冇咁肥,
將之前一晚的醬汁加熱倒上面就食得, 好方便呢!
今次記得放檸檬片喇~~靚仔好多^v^
留言列表